Къуръан цIалиялъул щукруялъулги суждаялъулги бицен буго гьаб. Къуръан цIалиялъул сужда суннатаб буго, цIалулесеги рагIарасеги, какилъ вугесги сужда гьабила. Жинцаго цIалулеб бугони я жиндир имамас цIалун гьес сужда гьабуни, имамас гьабун маъмумас гьабичIого тани маъмумасул как хвела, имамас гьабичIого гьабуниги хвела. Сужда гьабизе гIоло какилъ сужда бугеб аят цIалани сужда гьабизе бегьиларо, гьабуни как хвела.
Какилъ сужда гьабулеб куц: Аллагьу акбарги абун сужда гьабизе къасдги гьабун гIодов ина, эхедеги Аллагьу акбар абун вахъина квералги хьвагIиларо хадуб хIалхьизеги чIеларо. Какилъ гьечIев чияс нийятги гьабила, как бухьиналъул Аллагьу акбарги абун квералги хьвагIун гIодове ина, суждаги гьабун Аллагьу акбарги абун эхеде ворхун салам кьела, суждаялда лъабцIул (СубхIана раббиял агIла ва бихIамдигьи) абила. Какил шурутIал гьаб суждаялъеги шартI буго. Кинабниги сужда гьабулеб бакI Къуръаналда анцIила ункъго буго. Амма ссадалъулъ бугеб сужда щукруялъул сужда буго, нийят гьадин гьабизе ккела: (Дица нийят гьабула щукруялъул сужда гьабизе Аллагьасе Аллагьу акбар). Гьаб сужда какилъ гьабизе бегьиларо, лъан гьабуни как хвела.
Щукруялъул сужда гьабизе суннатаб буго нигIмат тIаде бачIараб мехалъ, тIаса балагь араб мехалъ. Масала, вас гьавуни, я хIалалаб боцIи щвани, я гъанкъи цIаялдаса ворчIани, я балагь щварав чи вихьани, я гIассилъи загьир гьабулев чи вихьани. Балагь щварав чи вихьараб мехалъ гьабулеб балъго гьабила, гIассияв чи вихьарав мехалъ гьабулеб загьир гьабила. Гьев гIиссяналдаса вуссине заралалда хIинкъичIони.
Гьеб кIиябго гуреб сужда хIарамаб буго Аллагьасе гьабуни, Аллагь гуресе гIоло гьабуни капурлъула.