Унти — нилъер хIалбихьи ва Аллагьасул цIоб

Щивасда ракIалде щола абадиялъго Алжаналда талихIавлъун вукIине гIоло, ТIадегIанав Аллагьасде иманги лъун, лъикIал гIамалалги гьарун, хвалде хIадурлъизе кколевлъи.

 Унтарасде раккизе иналдалъун ракIалде щола гIемеразе мукъсанлъун, загIиплъун бугеб, Аллагьасул цIобалдалъун щивав чияс моцIазги лъагIелазги жиндаса лазат босараб сахлъиялъул бугеб кIвар. Жакъа гьев чиясде бачIараб унти ккола инсанасул сахлъи Аллагьасул цIоб букIин ва гьелъухъ кидаго Гьесие рецц гьабизе ккеялде кантIизе гIаламатлъун.
Унтарасде раккизе ин Исламалъ лъугьинабуна гьесухъе рокъоре яги гьев вегарав больницаялде унев нухтIа вукIагоги кIудияб кири жиндалъун щолеб Аллагьасе гьабулеб гIибадатлъун. Жинда Аллагьасул свалат-салам лъеяв Аварагас абуна: "Унтарасде ваккизе арав чи Алжаналъул "хирфаялъув" вугилан. "Хирфа" щибилан гьикъарабго гьес жаваб кьуна гьел ругин Алжаналъул нигIматал". Гьединго Аварагас (с.гI.в.) абуна: "Унтарасде яги диналъул вацасде ваккизе арав чиясде (малаикзабазда гьоркьоса) магъущас ахIула: "Дудаги дуца хIетIе чIараб нухалдаги Аллагьасул баркат лъуна ва дуе Алжаналъуб рукъ къачIан буго".
Унтарасде ваккизе иналдалъун Аллагьасда цебе тIадегIанаб даража щвей цIакъ кIудияб лъикIлъи буго. Аварагас (с.гI.в.) абуна: "Цогидав бусурманчиясде ваккизе унев бусурманчиясухъе Аллагьас витIула гьесие дугIа гьабулев лъабкъоялда анцIазарго малаик. Гьев къад унев вугони, гьез бакъ инегIан гьабула гьесие дугIа, сардилъ унев вугони, рогьинегIан гьабула".
Жинда Аллагьасул свалат-салам лъеяв Аварагас жиндирго асхIабзабазда кидаго абулаан, малъулаан унтаразде раккизе инчIого чIогейилан. Цо нухалда гьес жиндирго асхIабзабазда гьикъана: "Нужеда гьоркьоса лъица жакъа кIал ккун бугеб?" — ан. Абу Бакарица жаваб кьуна, жинца жакъа кIал ккун бугилан. Аварагас нахъеги гьикъана: "Хвел букъиялъулъ жакъа нужеда гьоркьоса щив гIахьаллъарав?" — ан. Абу Бакарица жаваб кьуна, жив гIахьаллъанилан. Аварагас гьикъана: "Нужеда гьоркьоса лъица жакъа язихъав чи кваназавурав?" — ан. Абу Бакарица жаваб кьуна, жинца гьавунилан. Аварагас гьикъана: "Нужеда гьоркьоса щив жакъа унтарасде ваккизе арав?" — ан. Абу Бакарица жаваб кьуна, жив ун вукIанилан. Жинда Аллагьасул свалат-салам лъеяв Аварагас абуна, гьел гIамалал жиндилъ цолъарав чи хIакълъунго Алжаналде унилан.
Жинда Аллагьасул свалат-салам лъеяв Аварагас, унтарасде раккизе айилан гуребги, дугIаби гьарун, ракI батизабун, гьезда бугеб захIматаб хIал бигьалъизабизе хIаракат бахъейиланги малъулаан. Аварагасул лъади ГIайшатица бицана, унтарасде аскIове жаниве лъугьараб мехалда, жинда Аллагьасул свалат-салам лъеяв Аварагас гьесие дугIа гьабулаанилан.
Цо асхIабас бицана, Авараг ун вукIанин гочарулев гIарабиясде ваккизе. Унтарасухъе щведал Аварагас гьесда абунин: "Дуца цIакъго цIикIкIун ургъел гьабизе ккараб жо гуро гьеб. Аллагьасул къудраталдалъун дур мунагьал чурила", — ян.
Авараг (с.гI.в.) вукIана тамахав, хIеренав чи. Жиндирго баркат бугеб квер хIеренго бахъулаан гьес унтарасда тIад ва гьесие дугIаги гьабулаан, унти бигьалъизабизе, унтиялъул пикрабаздаса гьев вуссинавизе ва гьесул рекIелъе рохел лъугьинабизе бокьун. Аварагасул (с.гI.в.) лъади ГIайшатица бицана: "Нижер цониги чи унтани, кваранаб квералъ гьевги лъухьулаго гьес абулаан: "Унти тIаса босе, тIолалго гIадамазул БетIергьан. Гьев сахлъизаве, хIакълъунго Мун вуго сахлъизаризе хIалкIолев. Дудасан гурони сахлъи гьечIо. Унти тIаса унеб сахлъи рещтIинабе". Гьеб дугIа гьабулаго нилъеда лъазе ккола гIицIго Аллагь вуго сахлъизаризе хIалкIолев, Гьесул кверщаликь буго кинабго ва Гьев сундуего хIалкIолев вуго, инсанасда тIадаб буго гIицIго жиндиего дару балагьизе. Щайгурелъул нилъеда лъаларелъул сахлъиялъе сабаблъун щиб яги щив Аллагьас гьавилевали.
Гьедин унтаразе ва захIмалъиялде ккун больницабазде ва поликлиникабазде рачIаразе кумек гьабиялъулъ гIахьаллъарал лъикIал гIадамазе Исламалъ бихьизабун буго бицун хIалкIоларебгIан кIудияб кири. Гьеб буго кири бокьун, тIубарал моцIаз как-кIалалда тIад чIун, гIибадаталда ругезе букIунаребгIанги цIикIкIараб кири.
Жинда Аллагьасул свалат-салам лъеяв Аварагас абулеб буго: "Бищунго цIакъ Аллагьасе вокьулев чи ккола жиндасан гIадамазе бищун цIикIкIараб пайда бугев чи. Бищунго цIикIкIун Аллагьасе рокьулел гIамалал (ишал) ккола бусурманчиясул рекIелъе рохел лъугьинаби яги гьезда тIаса къварилъи-пашманлъи инаби, яги гьесул налъи бецIи, яги, вакъун хутIидал, гьев гIорцIизави. Дун гьедула, диналъул вацасда цадахъ ун, гьесул хIажат тIубай лъикIаб бугин, гьаб мажгиталъуб тIубараб моцIалъ тIагIат-гIибадат гьабиялдаса".
Гьединго гьес абуна: "Аллагь Жиндирго лагъасе кумек гьабулев вукIуна жиндир (диналъул) вацасе кумек гьабулев гьев вугевгIан заманаялъ".
Гьелде тIадеги, Исламалъ абула, унтарасде раккизе ине кколин, цогидаб диналъул чи гьев вугониги. Гьеб бихьизабулеб буго щибаб къоялъ гьесул рукъалъул нуцIил кIалтIе хъублъи бан, жинда Аллагьасул свалат-салам лъеяв Аварагасе къварилъи гьабулев вукIарав жугьутIазул цо гIолохъанчиясул ккараб лъугьа-бахъиналъ.
Цо къоялъ рокъоса къватIиве вахъараб мехалда, Аварагасда жиндир нуцIил кIалтIа щибниги батичIо. Гьес гьикъана дов гIолохъанчиясул хIакъалъулъ. Гьесда бицана, дов унтун вугилан.Гьеб лъайдал, жинда Аллагьасул свалат-салам лъеяв Авараг гIедегIана гьесде ваккизе ине, гьесул сахлъи цIехана. Гьелдаса хадуб гIолохъанав жугьутIав Исламалде вачIана.
Унтарасул ракI гIодобиччала унти Аллагьас гьесул хIалбихьизе тIамураб бугилан абуни. ТIадегIанасул саламлъун рикIкIунеб унтуе сабру гьабун чIани, гьесие кIудияб кири буго, амма гьелде данде чIун, шукруялдаса рикIкIалъани, гьев унтул гIазабалда гъоркь хутIула ва гьесда Аллагьасул цинги бахъуна.
Жиндаса Аллагь разилъаяй ГIайшатил гIагарал гIолохъаби, хIежалъул къоязда гьелъухъе рачIиндал, релъанхъулел рукIана. Нуж сунда релъанхъулел ругелин гьикъана гьелъ. Гьез бицана: "Цо чи чадиралъул квариде тIаде вортана. Гьелъул хIасилалда гьесул габур бекизе ва бер бахъизе дагьалъ хутIана", — ян. Гьелъ абуна: "Нуж релъанхъуге. ХIакълъунго дида рагIана Аллагьасул расулас гьадин абулеб: "Цо пуланав бусурманчиясда заз къани яги гьесие гьелдаса цIикIкIараб ккани, Аллагьас гьесул даража борхизабула ва гьесул цо мунагьалда тIасаги лъугьуна".
Жинда Аллагьасул свалат-салам лъеяв Аварагас абуна: "Жиндие цо гIузру яги захIмалъи, унти яги пашманлъи, хIатта рекIел рахIат хвезабулеб къварилъи ккарав муъминчиясул мунагьал чурула", — ян. Бакъул унтиялъул (сири) хIакъалъулъги гьес абуна: "Гьелъ гIадамил лъимал мунагьаздаса рацIцIад гьарула, перелоялъ махх кьавуялдаса бацIцIад гьабулеб гIадин".
Ахиралдаги, хитIаб гьабун, абила, — Нижер рекIедаги хIунсулеб бугин дуде бачIараб унти ва гьелъул захIмалъи тIаса бикьизеги бокьун бугин, ракI-ракIалъ абизе тIадаб буго нилъеда нилъер унтарал вацал-яцаздехун. Цинги абила, — нижеца Аллагьасда гьарулеб буго мун Гьес хехго сахлъизавейилан. Нижер хьулги буго мун хехго сахлъилин гьаб унти сабаблъун дур сабруги щулалъараб, Аллагьас хъвараб хIехьезе дур шукруги камиллъараб ва Гьесдаса дуе кириги цIикIкIараб заманалда дуца, цебего гIадин, жамгIияб гIумруялъулъ жигараб гIахьаллъи гьабилин.
 

Добавить комментарий

Ваш адрес email не будет опубликован. Обязательные поля помечены *