БоцIуда квер гIатIидав, сахавалъи бергьарав,
Муруватлъи цIунарав намус хIаяъ бацIцIадав.
БоцIуде мугъ рехарав, дуниял рехун тарав,
Дин сабаблъун росу тун, гьижра гьабун вахъарав.
АхIмадица къварилъи бокьун тIаса бищана,
Бечедавлъун вукIине ракIалъе къабуллъичIо.
Аллагьас АхIмадихъе Исрафил витIун щвана,
Ракьалъул хазинаби тIолго гьесий рагьеян.
Тугьаматалъул мугIрул месед гIарцул гьареян,
Жавгьаргун зумруд якъут рагьейилан гьесие.
Гьудул Жабраиласул ишараялда рекъон,
Аллагьасе бацIцIадаб лагълъи тIаса бищана.
Мавла я салли ва саллим даиман абадан,
ГIала ХIабибика хайрил халкъи куллигьимин.
Хирияв ХIабибуллагь тIадегIанав Аллагьас,
Бищунго тIадегIанаб тIабигIатгун вижана.
Аллагьасукьа хIинкъи ракI тIеренлъи кутакав,
ХIинкъи ккараб бакIалда бищунго бахIарчияв.
БахIарчилъи гьабизе жиндилъ чи бажаричIев,
Бищун чIухIарал бутIруз бутIрул жиндий къуларав.
Къварилъи тIад цIачIого рохалида вукIунев,
КIвакIвадун велъуларев, амма гьими гIемерав.
Бесдалазда цIоб лъолев, ятимзаби хьихьулев,
Лагъзал тархъун риччалев, руччабазулъ варшадав.
Цебе лъураб кваниде кидаго гIайиб чIвачIев,
Берцин бихьараб кванан, рихараб жибго толев.
Батараб жо кваналев гьечIеб балагьуларев,
Бугелда цIакъ разияв къанагIалъи бокьулев.
БогIол чедалъ гIорцIичIев, чехь цIезегIан кваначIев,
ЧамасдакIгун лъималда сардал къоял тIамурав.
Хъал бахъун пихъ кваначIев, ханжу цIалкIида хъвачIев,
Чахьалда къоно бухьун ракъул захIмат баччарав.
Бищунго бокьулеб пихъ цIибил батIих букIана,
ХъахIгьоло, гьоцIо, хIалва, микьир, хъабахъ букIана.
ЧIобого чед кваназе ракIалъе гIолароан,
Щванани гьелда данде батIих охцер кунаан.
ГIанкIудул, чIоролалъул, гIанкIил, вараниялъул,
Ралъдал хIайваназулги гIиялги гьан кванана.
Данде жоялъул ханлъун гьан бихьизе гьабуна,
Халкъалъе рухсагь кьуна батIа-батIал чундузул.
Кванай кваранаб кверзул килщаца букIунаан,
Лъабго килшица босун ункъабилеб хIалай чIун.
Устул тах бакIалда тIад киданиги кваначIо,
Аллагьасул лагъгIадин гIодов чIун кваналаан.
Живго цохIо кваназе цIакъ рихараб букIана,
КIиго данде жо цадахъ кванда данде кваначIо.
Гьекъолеб лъим лъабцIулго хIухьбан цIун гьекъолаан,
Жиб жибалде бисмиЛлагь алхIамдулиЛлагь абун.
Лъим кидаго гIодов чIун хIухь бахъун гьекъолаан,
Вахун чIунги гьекъана гIузру бугеб мехалда.
ТIад ретIунеб ретIелги мискинлъи тIаса бищун,
Бищунго жиб гIадатаб хъачIаб балагьулаан.
ГIемердинаб ретIелги гурде тIажу букIана,
ХалгIатги ретIунаан къватIиве вахъунелъул.
Бищун бокьулеб ретIел хъахIаб ретIел букIана,
ТIугьел багIараб ретIел ретIине какулаан.
РатIлилъ чIухIи берцинлъи тIалаб гьабулароан,
Бугеб ретIел бацIадго узданго ретIунаан.
ТIоргъода тIад чармаги батIа батIаб къалаан,
Жиб жиб заманаялъул тIалабалде балагьун.
Жибго къараб мехалда чармаялъул цояб гIинт,
РокьобгIанасеб къадар мугъзаде далулаан.
Баргъич гIарцул букIана жиндирго нагIли бугеб,
НагIли гIакъикъалъулги букIанилан абула.
Баргъичги гIемердинаб квараналда холаан,
НагIли жанибхун гьабун чIухIи букIинаредухъ.
Баргъичалда мугьруги лъабго мухъил букIана,
Берцинго бикIун хъвараб МухIаммад расулуЛлагь.
Бусен тIамун букIана чIар-чIахI жанибе хъвараб,
Ялъуни хъачIаб ретIел кIичIван гъоркье рехараб.
ГIемерисеб мехалда гIицIго чIар-хералда тIад,
Гьеб гьечIони ракьалда чIарбида вегулаан.
Кьижулаан Авараг кваранаб хьибилалда,
КIаркьада гъоркь кверги лъун къиблаялдеги вуссун.