ГIуриса ХIусенил МухIаммад Афанди накълулъарабго гьесде ГIалил МухIаммад хIажияс гьабураб
Гъурбаталда зулмудукь гъаримго хварав ЯгIсуб,
Халил ХIумайд афанди цинги Сасикъа ХIусейн.
МархIаба МухIаммадан хIурматалда аскIор щун,
Барзахалде дур рухIгун цадахъ рукIун ратила.
Анбияазул хатам силсилаялъул бетIер,
ТIолго дуниял гIалам жиндий гIоло бижарав.
Насаб-хIасаб бацIцIадав мурсалиназул сайид,
МугIжизатал гIемерав мигIраж щун хиралъарав.
Гьавураб сагIаталъги рухI босулеб гIужалъги,
МахIшаралъул къоялъги умматилан ахIдолев.
ГIелмуялъул мадинагь хIикматалъул хазинагь,
МухIаммад тIоцебесеб зодов вачIун ватила.
ТIарикъат загIифлъидал гьелъул хIубилъун чIарав,
Дуе салам гьабизе дур рухIгун данде чIвазе.
АхIмадил кваранаб квер тIоцевесев халифагь,
Киданиги гьереси жинца бицинчIев сидикъ.
ГIелму гIакълу цIикIкIарав бищунго сахаватав,
Жиндир божарав вакьад Абубакарги вачун.
Кафурзабазе тIагIун мушрикиназе вабаъ,
ШаригIаталъул хIуби ракI къвакIарав багьадур.
ХIакъабги батIулабги батIа гьабулев фарукъ,
ГIадлу жиндир битIарав ГIумарги цадахъ вачун.
ХIабибас кIиго яс кьун ракI бохизе гьабурав,
Берцинлъи камиллъарав садакъаби гIемерав.
Кидаго расуласе кваранаб кверлъун чIарав,
Къуръан данде гьабурав ГIусман асхIабги вачун.
Банугьашимилазул тIоцевесев халифагь,
Хъанчий лагълъи гьабичIев гьунар тIокIав рагъухъан.
Аллагьасул гъалбацIан тIокIцIар жиндида тарав,
Хайбаралъул къоялда байрахъ кодобе кьурав.
Дунялалъул бахIарзал жиндие мукIурлъарав,
ГIелмуялъул рагьуян Аварагас абурав.
Халафаталъул хатам муттакъиназул имам,
ХIасан ХIусайнил эмен ХIайдар ГIалиги вачун.
ХIабибасул берзул нур шугьадаазул Сайид,
ГIелму гIакълу цIикIкIарав жиндирго сибтI ХIасангун.
Язидил хIиллабаца Карбилаалда чIварав,
Зобалазги ракьалъги жив чIвадал чIегIер барав.
ФасихIаб мацIалъ бетIер къотIун хадуб кIалъарав,
Керен гIелмудул цIурав сайид ХIусейнги вачун.
Мугьажирал ансарал агьлугун асхIабзаби,
ЧIаго алжан баркарал гIашрул мубашаринал.
Бадругун УхIудалъул шугьадаалгун цадахъ,
КIиявго гьезул бутIрул ХIамзат ГIаббасгун цадахъ.
Зобалазул агьлоялъ тIолго малайкзабаца,
Киналго анбияаз цинги мурсалинаца.
ГIиллийуналда ругел киналго лъикIал рухIаз,
Духъ рокьи жидер ккарал тIолго хIурулгIинзабаз.
Иргадасан квер босун пашманлъи загьир гьабун,
Суннатаб къагIидаялъ тагIзият къабул гьабун.
Зигара бан батила хирияв ТIагьаясда,
Дур наиб накълулъидал пашманго вугищилан.
Черхалдаса батIалъун гIишкъоялъул цIа рекIун,
Щавкъалъ бухIулеб бугеб гIазизаб рухI регIизе.
ГIиллийуналъул макъам гьелда бихьизабизе,
ТIолго машаихзаби цадахъ рукIун ратила.
Гьезул бетIерлъиялда бищунго жал рацIцIадал,
Меседил силсиладул сайидзаби ратила.
Карбилаалъул къоялъ чIвачIого жив хутIарав,
Имам Зайнул ГIабидин хирияв ХIусайнил вас.
ГIелмудул кьучIал лъалев магIарифал камилав,
ЛатIаифал тIубарав имам МухIаммад Бакъир.
Жиндир гьабураб дугIа гьебсагIат къабуллъулев,
МухIаммад Бакъирил вас имам ЖагIфару ссадикъ.
Туснахъалда загьру кьун Багъдадалда жив хварав,
ГIиракъалда машгьурав гьесул вас Мусал Казим.